Canllawiau

Enghreifftiau o e-byst gwe-rwydo, galwadau ffôn a negeseuon testun amheus sy’n ymwneud â CThEF

Diweddarwyd 22 April 2024

© Hawlfraint y Goron 2024

Mae'r cyhoeddiad hwn wedi'i drwyddedu o dan delerau Trwydded Agored y Llywodraeth v3.0 ac eithrio ble nodir yn wahanol. I weld y drwydded hon, ewch i nationalarchives.gov.uk/doc/open-government-licence/version/3 neu ysgrifennwch at y Tîm Polisi Gwybodaeth, Yr Archifau Gwladol, Kew, Llundain TW9 4DU, neu anfonwch e-bost at: psi@nationalarchives.gov.uk.

Lle byddwn wedi nodi unrhyw wybodaeth am hawlfraint trydydd parti, bydd angen i chi gael caniatâd gan ddeiliaid yr hawlfraint dan sylw.

Mae'r cyhoeddiad hwn ar gael yn https://www.gov.uk/government/publications/phishing-and-bogus-emails-hm-revenue-and-customs-examples/df4ed536-caca-4a3e-ac48-6a518c1c36c6

I helpu ein hymchwiliadau, dylech roi gwybod i ni am bob e-bost gwe-rwydo, galwad ffôn a neges destun amheus sy’n ymwneud â CThEF.

Rhoi gwybod i CThEF am alwadau ffôn, e-byst neu negeseuon testun amheus (yn Saesneg).

Hyd yn oed os cewch yr un cysylltiadau twyllodrus (neu rai tebyg) yn aml, rhowch wybod amdanynt.

Peidiwch ag agor atodiadau na chlicio ar unrhyw gysylltiadau mewn e-bost neu neges destun annisgwyl — gallant gynnwys meddalwedd faleisus neu gallant eich cyfeirio at wefan gamarweiniol.

Dilëwch unrhyw e-byst neu negeseuon testun unwaith y byddwch wedi rhoi gwybod amdanynt.

Codau QR

Mae CThEF yn defnyddio codau QR yn ein llythyrau a’n gohebiaeth. Bydd y cod QR fel arfer yn mynd â chi i arweiniad ar GOV.UK. Byddwn yn dweud wrthych os yw’r cod QR yn mynd â chi i unrhyw le arall.

Ni fyddwch byth yn cael eich cymryd i dudalen lle mae’n rhaid i chi fewnbynnu gwybodaeth bersonol.

Pan fyddwch wedi mewngofnodi i’ch cyfrif CThEF, mae’n bosibl y byddwn yn defnyddio codau QR i’ch ailgyfeirio. Er enghraifft, i fynd â chi i dudalen mewngofnodi’ch banc.

Os ydym yn defnyddio codau QR mewn gohebiaeth, byddwch yn gallu eu gweld ar dudalen cysylltiadau gwirioneddol CThEF.

Er mwyn helpu gyda’r frwydr yn erbyn sgamiau gwe-rwydo, anfonwch unrhyw e-byst amheus sy’n cynnwys codau QR i phishing@hmrc.gov.uk neu gwasanaeth.cymraeg@hmrc.gov.uk ac yna dilëwch nhw.

Negeseuon testun

Mae CThEF yn anfon negeseuon testun at rai o’n cwsmeriaid.

Yn y neges destun, efallai y byddwn yn cynnwys cysylltiad i wybodaeth ar GOV.UK neu i wasanaeth sgwrs dros y we CThEF.

Ni fydd CThEF byth yn gofyn am wybodaeth bersonol nac ariannol wrth anfon negeseuon testun atoch.

Rydym yn eich cynghori i beidio ag agor unrhyw gysylltiadau, nac ymateb i unrhyw negeseuon testun, sy’n honni eu bod oddi wrth CThEF, ac sy’n cynnig ad-daliad treth yn gyfnewid am fanylion personol neu ariannol.

Er mwyn helpu gyda’r frwydr yn erbyn sgamiau gwe-rwydo, dylech anfon unrhyw negeseuon testun amheus i 60599 (costau rhwydwaith yn berthnasol), neu anfonwch e-bost i gwasanaeth.cymraeg@hmrc.gov.uk neu phishing@hmrc.gov.uk ac yna ewch ati i ddileu’r negeseuon testun hynny.

Delwedd sy’n dangos enghraifft o neges destun CThEF dwyllodrus sy’n ceisio’ch annog i glicio ar hypergysylltiad a nodi manylion personol.

Sgamiau cysylltiedig â choronafeirws (COVID-19)

Sgamiau drwy neges destun

SMS ‘Ad-daliad COVID-19’

Byddwch yn wyliadwrus o sgamiau amrywiol drwy neges destun sy’n cynnig ad-daliad treth CThEF mewn cysylltiad â phandemig COVID-19.

Peidiwch ag ateb y neges, a pheidiwch ag agor unrhyw gysylltiadau ynddi.

Sgamiau yn ymwneud ag ad-daliad treth

E-byst

Ni fydd CThEF byth yn anfon hysbysiadau am ad-daliadau treth drwy e-bost.

Peidiwch â gwneud y canlynol:

  • clicio ar gysylltiad er mwyn ymweld â gwefan y cyfeirir ati mewn e-bost ‘ad-daliad treth’

  • agor unrhyw atodiadau

  • datgelu unrhyw wybodaeth bersonol neu wybodaeth am daliadau

Mae’n bosibl y bydd twyllwyr yn ffugio cyfeiriad e-bost go iawn neu’n newid yr ‘enw dangos’ i wneud iddo ymddangos yn ddilys. Os ydych yn ansicr, anfonwch y neges ymlaen atom ac yna’i dileu.

Enghraifft o e-bost gwe-rwydo a gwefan gamarweiniol


Delwedd sy’n dangos enghraifft o e-bost twyllodrus gyda hypergysylltiad sy’n mynd â chi i wefan we-rwydo.


Delwedd sy’n dangos enghraifft o wefan we-rwydo sydd wedi’i chynllunio i’ch twyllo i ddatgelu gwybodaeth bersonol.

Galwadau ffôn amheus

Mae CThEF yn ymwybodol o sgam galwadau ffôn awtomataidd a fydd yn dweud wrthych fod CThEF yn dwyn achos cyfreithiol yn eich erbyn ac y dylech wasgu 1 er mwyn siarad â gweithiwr achos a gwneud taliad. Sgam yw hon ac y dylech roi’r ffôn i lawr yn syth.

Efallai y bydd galwadau sgam eraill yn cyfeirio at dwyll rhif Yswiriant Gwladol neu’n cynnig ad-daliad treth ac yn gofyn i chi roi’ch manylion banc neu gerdyn credyd. Os nad ydych yn siŵr pwy sy’n ffonio, rydym yn argymell na ddylech siarad â phwy bynnag sydd ar ben arall y ffôn.

Os ydych wedi dioddef sgam a cholli arian, rhowch wybod am hyn i Action Fraud.

Defnyddir nifer o wahanol rifau ffôn i wneud galwadau gwe-rwydo. I’n helpu i ymchwilio i alwadau ffôn amheus, rhannwch fanylion galwadau yn ein ffurflen rhoi gwybod am alwad ffôn amheus (yn Saesneg). Rhowch y canlynol:

  • dyddiad yr alwad

  • y rhif ffôn a ddefnyddiwyd

  • cynnwys yr alwad

Negeseuon WhatsApp

Os ydych chi wedi tanysgrifio i sianel Llywodraeth y DU ar WhatsApp (yn Saesneg), byddwch yn cael diweddariadau a allai gynnwys negeseuon atgoffa achlysurol sy’n gysylltiedig â threth. Bydd y rhain yn hysbysiadau neges sengl ac ni fyddwch yn gallu ymateb.

Ni fydd CThEF yn cysylltu â chi am unrhyw reswm arall gan ddefnyddio WhatsApp.

Sgamiau dros y cyfryngau cymdeithasol

Mae CThEF yn ymwybodol bod negeseuon uniongyrchol yn cael eu hanfon at gwsmeriaid drwy’r cyfryngau cymdeithasol.

Canfuwyd sgam ar X (Twitter yn flaenorol) yn ddiweddar yn cynnig ad-daliad treth.

Nid yw’r negeseuon hyn yn dod o gyfrifon cyfryngau cymdeithasol dilys CThEF — sgam ydynt. Ni fyddwn byth yn defnyddio’r cyfryngau cymdeithasol i wneud y canlynol:

  • cynnig ad-daliad treth

  • gofyn am wybodaeth bersonol neu ariannol

Os nad ydych yn siŵr pwy sy’n berchen ar y cyfrif cyfryngau cymdeithasol, anfonwch y manylion drwy e-bost i: phishing@hmrc.gov.uk neu gwasanaeth.cymraeg@hmrc.gov.uk a’i anwybyddu.

Cwmnïau ad-dalu

Mae CThEF yn ymwybodol bod cwmnïau’n anfon e-byst a negeseuon testun yn cynnig hawlio ad-daliadau treth ar eich rhan, fel arfer am ffi. Nid yw’r cwmnïau hyn yn gysylltiedig â CThEF mewn unrhyw ffordd.

Dylech ddarllen y ‘print mân’ a’r ymwadiadau cyn defnyddio’u gwasanaethau.

Sgamiau tollau tramor CThEF

Mae CThEF yn ymwybodol o sgam dros neges destun ac e-bost sy’n rhoi gwybod i’r cwsmer fod yn rhaid iddynt dalu tollau tramor i gael parsel gwerthfawr nad yw’n bodoli.

Ni ddylid cymysgu’r sgamiau hyn â newidiadau a gyflwynwyd ar 1 Ionawr 2021, yn cynghori y gallai fod angen i rai defnyddwyr yn y DU sy’n prynu nwyddau o fusnesau yn yr UE dalu taliadau tollau pan fydd eu nwyddau’n cyrraedd. Dysgwch ragor am y rheolau newydd hyn ar GOV.UK.

Os ydych yn amau, rydym yn eich cynghori i beidio ag ymateb i unrhyw beth amheus, ond i gysylltu â CThEF yn phishing@hmrc.gov.uk neu gwasanaeth.cymraeg@hmrc.gov.uk ar unwaith ac i ddarllen arweiniad CThEF ar we-rwydo a sgamiau (yn Saesneg).

Back to top