Beth gewch chi trwy'r post bob mis Ebrill?

Bydd yr hyn a gewch drwy'r post bob mis Ebrill yn dibynnu ar sut rydych yn dychwelyd eich ffurflen dreth.

Lle bynnag y bo modd, mae Cyllid y Wlad am osgoi anfon ffurflen bapur i drethdalwyr nad ydynt yn debygol o'i defnyddio, er enghraifft, trethdalwyr:

• sy'n defnyddio'r Gwasanaeth Rhyngrwyd ar gyfer Hunanasesiad;
  
• sydd ag asiantau sy'n defnyddio ffurflen amnewid yn lle'r Ffurflen Dreth;
  
• sydd ag asiantau sy'n dychwelyd eu ffurflen trwy ddull electronig gan ddefnyddio'r Gwasanaeth Rhyngrwyd ar gyfer Hunanasesiad neu 'Gwasanaeth Cyflwyno Electronig' (GCE).

Os ydych yn drethdalwr Hunanasesiad ac rydych yn dychwelyd eich ffurflen bapur eich hun, byddwn yn anfon tair dogfen atoch bob mis Ebrill:

• Ffurflen Dreth Hunanasesiad
  Mae hon yn dwyn ynghyd yr holl ffigurau y mae eu hangen arnom i gyfrifo a gwirio eich bil treth. Mae'r ffurflen dreth graidd yn ymdrin â rhai mathau o incwm, rhyddhad a lwfansau. Dyma'r cyfan y bydd rhaid i rai pobl ei gwblhau. Efallai y bydd angen tudalennau atodol ar bobl eraill sy'n ymdrin â mathau eraill o incwm, fel incwm o gyflogaeth neu o hunangyflogaeth.
• Canllaw i'r Ffurflen Dreth
  Bydd hwn yn eich cynorthwyo i gwblhau eich ffurflen dreth. Mae'n cynnwys nodiadau esboniadol gyda chôd lliwiau ar gyfer unrhyw dudalennau atodol sydd wedi'u cynnwys gyda'ch ffurflen dreth. Er enghraifft, bydd cyflogai sydd â chyflog, cynilion a'r defnydd o gerdyn credyd cwmni yn cael ffurflen dreth gyda thudalennau atodol ar gyfer incwm o gyflogaeth, a Chanllaw i'r Ffurflen Dreth sydd â nodiadau esboniadol ar gyflogaeth.
• Y Canllaw Cyfrifo Treth
  Bydd hwn yn eich cynorthwyo i gyfrifo eich bil treth os ydych am wneud hynny. Mae canllawiau ar wahân ar gyfer pobl sydd ag enillion cyfalaf a rhai cyfandaliadau a thaliadau eraill.
  Sylwer: Nid oes Canllaw Cyfrifo Treth ar gyfer y Ffurflen Dreth Partneriaeth.

Os nad oes ymgynghorydd treth gennych, ond rydych yn dychwelyd eich ffurflen trwy ddull electronig gan ddefnyddio'r Gwasanaeth Rhyngrwyd ar gyfer Hunanasesiad, ni fyddwn yn anfon y Ffurflen Dreth a Chanllawiau papur safonol atoch. Yn lle hynny, byddwn yn anfon Rhybudd i Gwblhau Ffurflen Dreth atoch (SA316). Ni anfonir y rhain os yw Ffurflenni Treth yn cael eu hanfon ar ôl prif ddosbarthiad mis Ebrill. Mewn achosion o'r fath, bydd Ffurflen Dreth bapur yn cael ei hanfon bob tro.

Os oes ymgynghorydd treth gennych sy'n cwblhau'r ffurflen ar eich rhan, bydd y dogfennau a dderbyniwch bob mis Ebrill yn dibynnu ar sut mae'ch ymgynghorydd yn dychwelyd eich Ffurflen Dreth:

• Os yw'ch ymgynghorydd yn anfon eich ffurflen trwy ddefnyddio'r Gwasanaeth Rhyngrwyd ar gyfer Hunanasesiad neu'r Gwasanaeth Cyflwyno Electronig (GCE) neu ffurflen bapur amnewid, byddwn yn anfon Rhybudd i Gwblhau Ffurflen Dreth atoch (SA316).
• Os yw'ch ymgynghorydd yn dychwelyd y ffurflen bapur swyddogol atom, byddwn yn anfon y Ffurflen Dreth bapur atoch. Ni fyddwn yn anfon y Canllaw i'r Ffurflen Dreth na'r Canllaw Cyfrifo Treth atoch.
  Pa bynnag ddogfen a gewch, dylech ei rhoi i'ch ymgynghorydd treth cyn gynted â phosib.

Ble allwch chi gael mwy o wybodaeth i'ch cynorthwyo gyda'ch ffurflen dreth?

Mae gwybodaeth fanylach ar gael yn y taflenni cymorth a'r taflenni a restrir yn y Canllaw i'r Ffurflen Dreth. Mae'r rhain, yn ogystal â'r tudalennau atodol a ffurflenni Hunanasesiad eraill, ar gael o:

Llinell Archebu Hunanasesiad (Cymraeg)
Ffôn: 0845 7 660 830
Ffacs: 01766 516100

Llinell Archebu Hunanasesiad (Saesneg)
Ffôn: 0845 9000 404
Ffacs: 0845 9000 604
E-bost: St Austell Orderline

Os ydych yn ffonio o dramor:
Ffôn: 44 870 1555664
Ffacs: 44 870 1555778

Fel arall gallwch edrych ar y rhain neu eu dadlwytho o'r tudalennau Ffurflenni Treth a Nodiadau.

I gael cyngor ynglyn â Hunanasesiad, edrychwch ar y dudalen 'Pwt o Gyngor ar Hunanasesiad' dan wybodaeth a chymorth ychwanegol.

Oes unrhyw sylwadau gennych chi?

Rydym wedi profi'r ffurflen dreth a'r canllawiau yn drwyadl gyda threthdalwyr er mwyn eu gwneud mor hawdd i'w defnyddio â phosib. Os oes unrhyw sylwadau gennych ar y ffurflen neu'r canllaw, rhowch wybod i ni trwy ysgrifennu i:

Cymorth Hunanasesiad a Rhwydwaith
Ystafell 120, Kelsall House
Grange Central
Telford
Shropshire
TF3 4ER

Efallai na fyddwn yn gallu ymateb i bob un o'ch sylwadau, ond byddwn yn eu hystyried pan fyddwn yn gwella ein ffurflen dreth a'n canllaw yn y dyfodol.

Diolch am eich cymorth.