• Beth yw'r dyddiadau pwysig dan Hunanasesiad?
  
• Alla i gael estyniad i'r dyddiad cau ar gyfer dychwelyd y ffurflen?
  
• Os ydw i'n colli'r dyddiad ar gyfer cyfrifiad gan Gyllid y Wlad, fyddwch chi'n fodlon wneud hyn i mi?
  

A. Y dyddiadau pwysig i drethdalwyr yw:

Dyddiadau ar gyfer y Ffurflen Dreth

6ed Ebrill - Y flwyddyn dreth
Mae hon yn dechrau ar 6 Ebrill ac yn dod i ben ar 5 Ebrill: felly mae'r flwyddyn dreth 2001-02 yn dechrau ar 6 Ebrill 2001 ac yn dod i ben ar 5 Ebrill 2002.

30 Medi - Dyddiad cau ar gyfer anfon eich ffurflen dreth

• Os ydych am i ni gyfrifo eich bil treth dylech gwblhau eich ffurflen a'i dychwelyd erbyn 30 Medi ar ôl diwedd y flwyddyn dreth. Byddwn yn fodlon cyfrifo eich bil treth ar ôl y dyddiad hwn ond ni allwn warantu y byddem yn gallu dweud wrthych faint i'w dalu erbyn diwedd Ionawr.
  
• Dylech hefyd anfon eich ffurflen dreth atom erbyn 30 Medi os ydych am i unrhyw dreth sy'n daladwy (llai na £2000) gael ei chynnwys yng nghôd treth y flwyddyn ganlynol.

  Cofiwch: Os ydych yn cyflwyno eich Ffurflen Dreth dros y Rhyngrwyd bydd yr holl Feddalwedd a ffurflenni ar-lein yn cyfrifo eich bil treth i chi.

  31 Ionawr - Dyddiad cau terfynol ar gyfer anfon eich ffurflen dreth

• Os ydych yn penderfynu cyfrifo eich bil treth eich hun, mae'n rhaid i chi gwblhau eich ffurflen a'r cyfrifiad a dychwelyd eich Ffurflen Dreth erbyn 31 Ionawr ar ôl diwedd y flwyddyn dreth.

  Gallwch anfon y ffurflen yn gynharach os ydych yn dymuno. Nid yw hyn yn golygu y bydd rhaid i chi dalu eich treth yn gynharach.

Dyddiadau ar gyfer taliadau

31 Ionawr a 31 Gorffennaf - Talu'r dreth sy'n daladwy

Fel arfer bydd taliadau ar gyfrif, sy'n gyfwerth â hanner y dreth incwm sy'n daladwy ar gyfer y flwyddyn flaenorol, yn daladwy ar ddau ddyddiad fel rheol

• 31 Ionawr yn y flwyddyn dreth
  
• 31 Gorffennaf ar ôl diwedd y flwyddyn dreth
  yna taliad o'r gweddill, os oes angen, ar 31 Ionawr ar ôl diwedd y flwyddyn dreth. Dyma'r un adeg â'r dyddiad cau ar gyfer dychwelyd y ffurflen dreth.

  Nid yw'r dyddiadau talu yn newid, hyd yn oed os ydych yn dychwelyd eich ffurflen yn gynnar.

  Am fwy o wybodaeth ar ddyddiadau a dyddiadau cau, a siart hwylus i'w hargraffu, edrychwch ar 'Ddyddiadau Allweddol'.

  Sylwch mewn rhai achosion prin gall y dyddiadau talu newid, er enghraifft, os cafodd eich ffurflen ei hanfon atoch yn hwyrach na phawb arall.

Dyddiadau ar gyfer cyflogwyr a chyflogeion

Mae'n rhaid i gyflogwyr roi'r wybodaeth y mae ei hangen ar eu cyflogeion er mwyn cwblhau eu
ffurflenni treth.

• ffurflen P60 - sy'n dangos y tâl a'r dreth ar gyfer y flwyddyn - erbyn 31 Mai
  
• yr wybodaeth o ffurflenni P11D a P9D sy'n dangos treuliau a buddiannau - erbyn 6 Gorffennaf.

Am fwy o wybodaeth ar sut mae Hunanasesiad yn effeithio ar gyflogwyr, yn ogystal â rhai awgrymiadau defnyddiol, edrychwch ar yr adran Cyflogwyr ar dudalen Mynegai HA.

Cw. Alla i gael estyniad i'r dyddiad cau ar gyfer dychwelyd y ffurflen?

A. Na allwch. 31 Ionawr yw'r dyddiad cau ar gyfer dychwelyd eich ffurflen dreth.

Codir cosb awtomatig o £100 os nad ydym wedi derbyn eich ffurflen erbyn 1 Chwefror.

Os yw'r Ffurflen Dreth heb gael ei derbyn chwe mis yn ddiweddarach, bydd rhaid i chi dalu £100 arall.

Gallwch apelio yn erbyn hwn, ond bydd rhaid i chi ddangos bod achos da gennych dros golli'r dyddiad cau.

Os ydych am i ni gyfrifo eich bil treth, dylech anfon eich ffurflen atom erbyn 30 Medi. Os ydym yn derbyn eich ffurflen ar ôl y dyddiad hwnnw, mae'n bosib na fyddwn yn gallu rhoi gwybod i chi mewn pryd beth sy'n rhaid i chi dalu er mwyn i chi ei dalu erbyn 31 Ionawr. Os yw'ch taliad yn hwyr efallai y codir llog arnoch ac o bosib gordaliad.

Am fwy o wybodaeth ynglyn â chosbau gweler Llyfryn SA/BK6 - Hunanasesiad - Cosbau ar gyfer ffurflenni treth hwyr.

Am fwy o wybodaeth ynglyn â gordaliadau, gweler Llyfryn SA/BK7 - Hunanasesiad - Gordaliadau ar gyfer talu treth yn hwyr. Gallwch edrych ar y rhain o'r safle hwn neu gallwch eu cael o'ch swyddfa Cyllid y Wlad leol.

Cw. Os ydw i'n colli'r dyddiad ar gyfer cyfrifiad Cyllid y Wlad, fyddwch chi'n fodlon wneud hyn i mi?

A. Byddwn. Byddwn yn hapus i gyfrifo eich treth i chi ond, os ydym yn derbyn eich ffurflen ar ôl 30 Medi, ni allwn warantu y gallwn roi gwybod i chi beth sy'n daladwy mewn pryd i chi dalu erbyn 31 Ionawr. Byddai hyn yn golygu bod rhaid i chi amcangyfrif faint i'w dalu. Os nad ydych yn talu digon, bydd rhaid i chi dalu llog ac o bosib gordaliad.

Bydd y rhan fwyaf o bobl yn y sefyllfa hon yn cael nodyn atgoffa ym mis Ionawr. Bydd hyn yn un o'r canlynol:

• SA309A - Nodyn Atgoffa ar gyferFfurflen Dreth a thalu
  Anfonir hwn fel nodyn atgoffa i beidio â cholli'r dyddiad cau 31 Ionawr ar gyfer dychwelyd eich ffurflen a thalu ac mae'n cynnwys slip talu a chyfarwyddiadau ar sut i dalu.
  
• SA309B - Nodyn Atgoffa ar gyfer Ffurflen Dreth Partneriaeth
  Fe'i hanfonir at bartneriaethau sydd heb ddychwelyd eu ffurflen.
  
• SA309C - Nodyn atgoffa ar gyfer taliad mis Ionawr
  Fe'i hanfonir pan fydd y ffurflen wedi cael ei derbyn ond nid yw wedi cael ei phrosesu fel nodyn atgoffa i chi beidio â cholli dyddiad cau 31 Ionawr. Mae'r nodyn atgoffa yn cynnwys slip talu a chyfarwyddiadau ar sut i dalu.

Mae'r Llyfryn SA/BK7 Hunanasesiad - Gordaliadau ar gyfer talu treth yn hwyr, yn rhoi gwybodaeth bellach ynglyn â'r gordaliadau sy'n daladwy os ydych yn talu treth yn hwyr. Gallwch edrych arno ar y safle hwn neu gael copi o'ch swyddfa Cyllid y Wlad leol.